Առաքման ժամանակ մանրադրամ ունեցիր. մեր փորձը

Ավելացված է Մեկնաբանել

Որպեսզի հաճախորդների սպասարկման հարցում բարձր արդյունքների հասնես, պետք է, անջատելով սեփական ԵՍ-ը, պարզապես հետևես և լսես: Մեր գործունեության սկզբնական շրջանում առաքումները կազմակերպելիս մենք առաքիչներին զգուշացնում էինք, որ ցանկալի է մանրադրամ ունենալ, եթե հաճախորդը մեծ թղթադրամներով վճարի: Սակայն եթե օրվա ընթացքում առաքիչը կատարում է 5-6 առաքում, և հաճախորդներից մի քանիսը վճարում են, օրինակ, քսան հազար դրամանոց թղթադրամներով, ապա մանրադրամն արագ սպառվում է, դրա մասին մտածելու ժամանակ այլևս չկա և ներքուստ ակնկալում ես, որ հաջորդ առաքման ժամանակ չես ստանա մեծ թղթադրամ: Սակայն լինում է այն, ինչ լինում է միշտ, երբ չես պատրաստվում. իրականանում է ամենից «ոչ ցանկալի» սցենարը:

Այդպես ունեցել ենք դեպքեր, երբ առաքիչը ստիպված է եղել (իհարկե՝ մեր մեղավորությամբ) բարձրահարկ շենքից աստիճաններով իջնել, հասնել մոտակա խանութը, փորձել մանր գումար հայթայթել, ապա բարձրանալ և վերադարձնել հաճախորդին գումարի ավել մասը: Ունեցել ենք նաև դեպքեր, երբ հաճախորդը ստիպված է եղել թողնել աշխատանքը որոշակի ժամանակով, սպասել՝ մինչև մանր գումարի հարցը լուծվի: Եղել են դեպքեր, երբ հաճախորդը երկար է սպասել, դեպքեր, երբ առաքիչը վազել է, դեպքեր, երբ ավելորդ լարվածություն է առաջացել:

Ինչ-որ պահից սկսած որոշեցինք այդ թեմային ավելի լուրջ վերաբերվել, քանի որ թվացյալ այս մանրուքը ավելորդ լարվածություն է ստեղծում և՛ հաճախորդի, և՛ առաքչի, և՛ մեզ մոտ: Հաճախորդներից շատերը, պատասխանատվության զգացումից ելնելով, փորձում են իրենք նախապես գումարը մանրել՝  նույնիսկ եթե այդ պահին դա իրենց հարմար չէ, իսկ առաքչի գլխում էլ առաքումից առաջ ավելորդ մտքեր են պտտվում՝ «Իսկ եթե կրկին մեծ թղթադրամով վճարե՞ն…»: Ուստի հաճախորդների սպասարկման մեր կանոնագրքում մենք ավելացրեցինք հերթական կանոնը.

Պարտադիր ունենալ մանրադրամ՝ հաճախորդի վճարած ցանկացած հնարավոր թղթադրամի համար

Այժմ մենք չենք կատարում առաքումը, եթե առաքիչը չունի մանրադրամ՝ վճարման ցանկացած տարբերակի դեպքում: Մեր հաճախորդներին մենք ապահովագրել ենք՝ խոստանալով, որ նրանք կարող են վճարել առաքանու արժեքի կեսը, եթե հաճախորդի մոտ չեղավ մանր գումար (առայժմ՝ Երևան քաղաքում): Այս կանոնը կիրառելուց հետո առաքիչները առաքումները կատարում են հանգիստ սրտով, իսկ հաճախորդները նրանց դիմավորում են առանց ավելորդ լարվածության: Իսկ երբեմն էլ կատակում ենք՝ «Եթե Ձեզ անհրաժեշտ լինի գումար մանրել, ապա պատվիրեք մեզ մոտ»:

Շատերին սա կարող է մանրուք թվալ: Սակայն եթե դիտարկես իրավիճակը աշխատանքից հոգնած տուն վերադարձած, ճանապարհին խցանումների մեջ ընկած, որևէ անախորժությունից տրամադրությունն էլ ավելի գցած հաճախորդի տեսանկյունից, ով ցանկանում է, որ գոնե օրվա վերջում ամեն ինչ հարթ անցնի, ապա պարզ կդառնա, որ իրականում նման մանրուքների «կուտակումները» կարող են մարդու վրա զգալի չափով ազդել: Իսկ ինչո՞ւ, եթե կարելի էր պատրաստվել:

Թողնել պատասխան

Ձեր էլ-փոստի հասցեն չի հրապարակվելու։