Երբ գուլպաների արտադրությունը նոր էինք սկսել, դրանք ընդամենը մեկ չափս ունեին: Քանի որ գուլպաները ճկվող էին և թեստավորել էինք դրանք տարբեր չափսի կոշիկ կրող տղամարդկանց շրջանակում, մեկ՝ 40-44 չափսի գուլպայով շուկա մտնելը վատ միտք չէր թվում: Երբ վաճառեցինք առաջին մի քանի տուփը, հաճախորդներից միայն գովեստի խոսքեր էինք լսում: Ոգևորված էինք: Սակայն առաջին վաճառքից երեք շաբաթ անց հեռախոսազանգ ստացանք:
Բովանդակություն
Բարկացած տղամարդը
Հեռախոսակապի մյուս կողմում տղամարդու բարկացած ձայն էր: «Նախորդ օրը ձեր առաքած գուլպաները,- վրդովված ասաց նա,- շատ մեծ են: Երբ գուլպան ձգում ես, կրունկը վեր է թռնում: Սկզբում մեծ ցանկություն ունեի ձեր ծառայությունից պարբերաբար օգտվելու, սակայն հիմա… ի՞նչ կառաջարկեք»:
Մենք չենք փորձում արդարանալ, երբ հաճախորդը դժգոհ է: Ուշադիր լսում ենք, վերլուծում և հետևություններ անում: Խոստացանք, որ եթե չափսը հարմար չէ, ապա հենց այսօր տուփը հետ կվերցնենք (բացառությամբ օգտագործված զույգի, որը նվիրում ենք) և գումարն ամբողջությամբ կվերադարձնենք: «Շատ լավ,- պատասխանեց հաճախորդը,- տեսնենք…»: Ձայնից զգացվում էր, որ կասկածներ ունի:
Առաջին կորցված հաճախորդը
Խոսակցությունից մի քանի ժամ անց գումարն ամբողջությամբ վերադարձրել էինք: Հաճախորդին խոստացանք, որ շուտով գուլպաները երկու չափսով կարտադրվեն, և նոր խմբաքանակն ունենալուն պես՝ իրեն տեղյակ կպահենք: «Եթե անհրաժեշտ լինի, ես ձեզ հետ կկապվեմ,- ասաց նա»: Ասելուց հասկացանք, որ նրանից երբեք զանգ չենք ստանա:
Անցավ երկու ամիս: Գուլպաները սկսեցինք արտադրել երկու չափսով՝ փոքր և մեծ (մինչև 42 և ավելի մեծ չափսի կոշիկ կրողների համար): Որոշեցինք տվյալ հաճախորդին տեղյակ պահել և փոքրիկ անակնկալ անել: Սակայն հեռախոսազանգին պատասխան չեղավ: Փորձեցինք երկու շաբաթ անց: Կրկին ոչ մի պատասխան: Համոզված էինք, որ կորցրել ենք վստահությունը, և նման եղանակով այլևս պետք չէ փորձել: Սակայն դժգոհ հաճախորդ ունենալու միտքը հանգիստ չէր տալիս. ինչ-որ բան էր պետք ձեռնարկել:
Ոչ սովորական փոստային նամակ
Հաճախորդին թղթե նամակ գրեցինք, որում ևս մեկ անգամ ներողություն էինք խնդրում կատարվածի համար: Ծրարի մեջ դրեցինք նաև նոր չափսի գուլպաներից մեկ զույգ՝ որպես նվեր, և ուղարկեցինք փաթեթը փոստով: Երկու օր անց հեռախոսազանգ ստացանք: Հաճախորդը հավանել էր նմուշը և ևս մեկ պատվեր կատարեց: Առաքումից երկու շաբաթ անց կատարեց հաջորդ պատվերը (պատրաստվում էր նվիրել): Ամիսներ են անցել: Տվյալ հաճախորդին ճանաչում են մեր բոլոր աշխատակիցները, շատերն՝ անձամբ, քանի որ նա շարունակում է պարբերաբար պատվիրել՝ բոլոր հնարավոր առիթներով: Մեզ համար դա մեծ ուրախություն է: Ուրախացնում է ոչ այնքան վաճառքների քանակը, որքան այն, որ կորցնելու փոխարեն՝ մենք ձեռք բերեցինք:
Հետևություններ
Աշխատանքի ընթացքում պատահականություններ, սխալներ, անհարմարություններ լինում են. չի ստացվում դրանցից խուսափել: Սակայն կարևոր է փորձի վրա սովորել և ավելի լավը դառնալ: Երբ իրավիճակին դիմացինի աչքերով ես նայում, կարողանում ես խնդիրը լուծել այնպես, ինչպես իրեն է հարմար: Իսկ երբ սխալն այլ տեղ ես փնտրում, անդառնալի կորուստ ես ունենում:
Հեղինակի մասին
